Akkasolanna Appadduwangnge

السلام عليكم ورحمة الله وبركاته

الحمد لله رب العالمين والصلاة والسلام على أشرف الانبياء والمرسلين سيدنا وحبيبنا وشفيعنا محمد صلى الله عليه وسلم وعلى آله وصحبه اجمعين. أما بعد

Appejeppunna Appadduwae

Naiyya riasengnge appadduwa iyanaritu  napakkonsiwi Puang Allah Ta’ala. Yarega engkana Puang rilainnae Puang Allah Ta’ala. Makkotoparo napakkonsiwi engkanai Puang Allah Ta’ala lebbi pole ri seddie.

Menurut Dr. Harun Nasution: Riasengnge appadduwa yanaritu natentuangngi engkanai Puang Allah Ta’ala lebbi pole riseddie.

Menurut Syaikh Muhammad Abduh: naiyya riasengnge appadduwa yanaritu napercayai engkanai mabbere rilainnai Puang Allah Ta’ala.

Jaji yero appadduwangnge saisai ateka mappatakkajenne nasaba napappada-padanai sewwa-sewwa laingnge sibawa akuasangenna Puang Allah Ta’ala, padahal napahangngi yero sewwa-sewwa napappada-padae sibawa Puang Allah Ta’ala de nullei mabbicara, denullei marengkalinga, denullei mabbere bantuan, lebbipiha appatakkajenne’na narekko pada nasompai sewwa-sewwae nasibawai pengorbanan, yanaritu nawerengngi anre, yakkeppa biasa nagereseng olo-kolo padahal degaga mullei manrei.

Yanarekkoero saisa manengngi gau mappasia-sia nenniya makkoja-kojang nasaba akkattana nasompai rekkoero maeloi ripapolengeng gau nenniya maeloi ritolakeng  sukkara padahal degaga tauwe murusu alena oncoppasiha maelo mabbere bantuan.

Makkedai Puang Allah Ta’ala ri sura Al-Haj ayat 12:

يَدْعُوْا مِنْ دُوْنِ اللهِ مَالاَ يَضُرُّهُ وَمَالاَ يَنْفَعُهُ ذَلِكَ هُوَ الضَّلاَلُ اْلمُبِيْنَ.

Bettuanna:       Pada narellaui pole rilainnae Puang Allah Ta’ala iyya de’e naullei solangiwi ritu (de naullei tolakengngi sukkara) nenniya de naullei papolengengngi guna. Yana rekkoero apusang mabela.

Rupa-rupanna Appaduwangnge

1.   Engka saisanna rupatau sompa alam pada-padanna ulengnge nenniya batue makkotorparo bolae yanaero nonroi mappaleppe nasaba natepperi nasengngi yero wedding passalamai nenniya penre’i dalle’na.

2.   Engka saisanna sompa sewwa-sewwa. Pada-padanna pake ciccing nenniya tiwi’i kawali. Iyaro ciccingnge risunnakengngi pakei makkomotoro kawalie nasuroangngi Nabitta tiwi anu matareng narekko maeloki cokka naekiya deto wedding riatekakeng yanaro passalamaki pole ri sukkarae.

3.   Engkato saisanna sompa olo-kolo. Pada-padanna sompa buaja nasaba natekakengngi yanaro naseng lasa-lasai nenniya pajjappai.

4.   Maegato sompa tau laona: yanaritu siara kubburu marellau sarekkuamengngi naenre dalle’na. Yaro assiara kubburu’e risunnakengngi sarekkoammengngi ribacangengngi dowang tau laota de nawedding rionroi marellau dalle nenniya asalamakeng.

Tingka’na Appaduwangnge

(1)  Appaduwang battowae, (2) Appaduwang lalo tengnga,            (3) Appaduwang baiccu

Naiiya riaseng appadduwa battuwa yanaritu natekakengngi engkanai Puang kuasa rilainnae Puang Allah Ta’ala. Jaji  engka naonroi marellai rilainnae Puang Allah Ta’ala nasaba yanaro narennuang passalamai pole riabalae yarega paleppei pole risussae yarega pajjappai pole ri lasa-lasae yetona narennuang papolengengngi aga napparelluang pole rirupa-rupanna pappenyamengnge.

Akkasolanna ri Teppe’e

1. Nasolangiwi atekae nenniya narusai teppe’e. Jaji namuni pura napuada duwae kalima syahada nenniya teppe’na. Jaji marotai.
2. Marutungngi amala’na. Jaji  namuni maga egana amala pura napapole naekiya mappadduwai maruttung manengngi amala purae napapole.
3. De nariaddappengeng dosana rimunri matena. Jaji narekko mappaduwai nade natobakengngi dosa appadduanna denagaga addapengenna. Jaji yero tau mappadduwae namate riappaduwanna harangngi tama suruga yakkeppa tamai ri ranaka mannennungeng, pada-pada kapere’e.

Makkedai Puang Allah Ta’ala:

اِنَّهُ مَنْ يُشْرِكْ بِاللهِ فَقَدْ حَرَّمَ اللهُ عَلَيْهِ اْلجَنَّةَ وَمَأْوَاهُ النَّارُ وَمَا لِلظَّالِمِيْنَ مِنْ اَنْصَارٍ.

Bettuanna:       Majeppu ritu nigi-nigi mappaduwa ri Puang Allah Ta’ala majeppu riharangengngi ri Puang Allah Ta’ala tama suruga, naiyya addakkarenna ranaka nenniya degaga napunnai tau maggau bawangnge patulung.

Naiyya tosi riasengnge appadduwa lalo tengnga yanaritu pada-padanna appemmalie. Yanaritu de namaelo papolei seddie rilalenna seddie esso yarega seddi wettu. Pada-padanna de namaelo jokkangngi esso nataddennekengnge posina, de namaelo monroi mappabbotting rilalenna uleng kacipirengnge nasaba napattentui nasengngi esso yarega uleng macilaka. Samannai nissengngi gau mallinrungnge nenniya engkai mappattentu, padahal degaga wedding missengngi nenniya pattentui anu mallinrungnge sangadinna Puang Allah Ta’ala. Jaji tau  engkae mappemmali riassakkarengngi ri Nabitta. Padatoha rirampewe riseddie haddese’:

لَيْسَ مِنَّا مَنْ تَطَيَّرَ اَوْ تُطُيِّرَ لَهُ اَوْ تَكَهَّنَ اَوْ تُكُهِّنَ لَهُ اَوْ سَحَرَ اَوْ سُحِرَ لَهُ....(رواه البخارى).

Bettuanna:    Degaga saisa pole riummakku tau mammanu-manu’e yarega tau riammanu-manukengnge, yarega massanro botoe yarega riassanro botoe, yarega massehere’e yarega riasseherekengnge.

Naiyya riasengnge mammanu-manu yanaritu napuningi uninna manu-manue, narekko majai uninna denamaelo jokkangngi nasaba napattentui nasengngi engka  abala maelo kajajiang. Nenniya riasengnge sanro boto yanaritu sanro matteppu-teppu yanaritu nasengngi naissengi anu mallinrungnge. Naiyya riasengnge sehere yanaritu gau sapeade mompo pole rikapere’e yarega tau majae.

Naiyya tosi riasengnge appadduwa baiccu yanaritu puji alewe. Yanaritu ripapolei amala’e tenniya nakarana Puang Allah Ta’ala riakkattai. Naekiya maelomi riita yarega maelomi riengkalinga ripadanna rupa tauwe, nakarena engka nacading, pada-padanna maelomi ripuji iyarega maeloi riwereng seddie anu nakkattaie. Naiyya tau papole’engngi amalae nasibawai puji ale sia-sia’i appalanna ri esso rimunri padatoha narampe Nabitta saw. ri seddie haddese’:

مَنْ سَمَّعَ سَمَّعَ اللهُ بِهِ وَمَنْ يُرَائِى يُرَائِى اللهُ بِهِ.

Bettuanna:    Nigi-nigi mapparengkalingangngi amalana ripareng kalingangngi amalana matti nenniya nigi mappita-pitangngi amalana ripita-pitattoi amalana matti.

Jaji engka saisanna tauwe ri esso rimunri riparengkalinga maneng nenniya ripitang maneng amala purae napapole, naekiyya de gaga appalanna natarima narekko napapolei amalae rilino nasibawai puji ale.

Makkoniro urapi palettukengngi mamuare’i napakkegunai Puang Allah Ta’ala lao ri idi maneng.

وَبِاللهِ التَّوْفِيْقِ وَالسَّعَادَةِ.

السَّلاَمُ عَلَيْكُمْ وَرَحْمَةُ اللهِ وَبَرَكَاتُهُ

Oleh : Drs. K.H.M.Syuaib Nawang
Source Mts pa 1 as'adiyah sengkang