STOP DURHAKA TERHADAP ORANG TUA

السلام عليكم ورحمة الله وبركاته

الحمد لله رب العالمين حمدا كثيرا طيبا مباركا فيه على كل حال، والصلاة والسلام على أشرف الانبياء والمرسلين سيدنا محمد وعلى آله وصحبه اجمعين. أما بعد

Sininna tomalebbikkeng engkae hadire.

Alhamdulillah sukkuruki mappoji lao ri sese arajanna Puang Allah Ta’ala nasa engkatta muanneng pada hadere ri lalenna iyae onrong mabbarakkae akkatta tuntu’i riona Puang Allah Ta’ala

Ri lalenna iyyae wettu mabbarakkae upumenasai Insya Allah rampengekki ada asiiparingerange iyanaritu: Bahayana madoraka ri to duae pajajiang.

Naiyya riasengnge toduae pajajiang iyanaritu ambo nenniya indo, tau iya jajiakki, ia ppiaraki nennia iyya jellokekki ri anu madeceng. Saisa pappedecenna tau matoae lao ri ananna iyanaritu napiarai watakkaleta mappamula baicutta lettu marajata, nawerekki ongkoso ritujunna kebutuhan sehari-haritta, nenniya ri lainnae.

Narimakkuannanaro, nasaba alebbirenna riasengnge tomatoa, de sise-siseng nawedding riadorakai, nasaba Puang Allah Ta’ala maladde nappatu-patukeng ri appedecengnge lao ri  toduwae pajajiang.

Makkedai Puang Allah Ta’ala ri surah al-Isra ayat 23-24:

وَقَضَى رَبُّكَ اَلاَّ تَعْبُدُوْا اِلاَّ اِيَّاهُ وَبِالْوَالِدَيْنِ اِحْسَانًا، اِمَّا يَبْلُغَنَّ عِنْدَكَ اْلكِبَرَ اَحَدُهُمَا اَوْكِلاَ هُمَا فَلاَ تَقُلْ لَهُمَا اُفٍّ وَلاَ تَنْهَرْهُمَا وَقُلْ لَهُمَا قَوْلاً كَرِيْمًا.  وَاحْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِى صَغِيْرًا.

Bettuanna:       Pura napettui Puangmu (E… Muhammad) majeppu ajallalo naengka pada musompa sangadinna alenami (Puang Allah Ta’ala) nenniya appedecekko lao ri tau duwae pajajiammu. Narekko nalttukiwi ri sesemu umuru atowangeng salasewanna iyarega iya duwa ajalalo mupuadangngi ritu ada Puwa (werekkada makassara) neniyya ajato mugera-gerai riu iya duwa nenniya puadangngi ritu ada-ada malebbi. Nenniya pakariawai alemu lao ri to duwae pajajiammu napakkuwa akkamase, nennia tellau doawangengi makkedae: E… Puang tamasei to duwae pajajiakku padatoha napiaraku ri wettu baiccukku.

Werekkada أفّ  ri lalenna iyae ayae iyanaritu ada makassara, de siseng nawedding ripuada riolona tomatuatta, nasaba termasuk’i seddi adorakang lao ri toduwae pajajiang.

Sehubungan pembahasatta iyyae, ritujunna tau madorakae ri tau duwae pajajian. Narekko pole matti esso kiyame seddi olokolo riaseng Khuraisy messu pole ri ranaka jahannam, temmaka lampena yanaritu mappamula ri tanae lettu ri langie, sakkana mappamula tomporeng kesso lettu onrong labuna essoe. Makkutanai malaikat Jibril, Pegatu maelo lao nenniya iga maelo muala (mujempu). Mappebali makkedae: lima rupanna maelo ujempu:

1.    Tau simata tetaengngi sempajangnge.

2.    Tau de’e namaelo pessu sekke waramparanna.

3.    Tau madorakae ri toduwae pajianna.

4.    Tau minungnge inungeng mappewaju.

5.    Tau simata mabbicara salae ri laleng masiji.

Engkato seddi kissah maelo upalettukekki ri idi maneng kissana, tau madorakae ri toduwae pajajianna:

Riwettunna Pangulutta Umar ra. Engka seddi padangkang (sogi), engka seddi wettu engkai kasi endona’ padangkangnge mellau ri ana’na untuk kebutuhan sehari-harinna. De’pa gaga riwerengngi, tappa metti maniha bainena iyae padangkangnge (manettunna), napuadangi matoanna mammata mutiwimi ri akasi-asingnge, nasaba esso-essoko maelo rialang balanca. Naengkalingana ada makkoero, tappa tassekke atinna, tappa terriwi lapong tomatowa nalesu lao ri bolana.

Walhasil, ri seddie wettu ieye padangkangnge laoni ri adangkangenna, ri tenggana lalengnge ri hadangngi ri seddie perampok inappa riala baranna iya maneng, makkotoparo isio, irette jarinna (limanna) ia dua inappa ripaggenoi, nainappana riaddeppereng.

Ri seddie wettu engkana tau tolongngi, inappa ri parewe lao ri bolana, engkani keluargana siaraiwi, aga napoadanni keluargana makkedae, iyanae pamalenna tau madorakaenngi tau duwae pajajiang, benengnge keluargaku (baineku), naweremmui indokku tempona mellau, deka gaga menderita mappakkua peddina.

Makkotoparo, engkatoni indo’na lao siaraiwi, nainappa mabberekkada: E… anakku, engkai tessekke atikku napakkua pangkaukenna keluargamu (bainemu). Nainappa la pong anana mellau addampeng ri tujunna atassalanna, nainappa riaddappengeng pole ri indo’na. Walhasil iyaro lapong anana tappa lessu paimeng punnai duwae lima (jari), nasaba addampenna indo’na.

Jaji rimakkuannanro aja lalo naengkaki termasuk tomadoraka di toduwae pajajiang, nasaba akkasollanna ri utamana ri idimaneng, rilino icalla memenni apalagi ri ahera. Narekko ribelaini pangkaukeng makkoero naweddinni tattiroang pole ru Puang Allah Tala, naweddikki salama ri lino nennia ri akhera.

Maasyiral muslimin rahimakumullah

Sikomiro urampengekki ri olota maneng, namamuare Puang Allah Taala napabbarakkai ri idi mameng. Amien.

وَبِاللهِ التَّوْفِيْقِ وَالسَّعَادَةِ.

السَّلاَمُ عَلَيْكُمْ وَرَحْمَةُ اللهِ وَبَرَكَاتُهُ.

 
Oleh: Alihuddin, S.Ag
Source : MTs As'adiyah Pa 1 sengkang